நான் பார்த்த சென்னை (காட்சி 9)

சென்னை ஜகந்நாத் கோயில்
 

சென்னைக்கு சென்றால் பார்க்க வேண்டிய முக்கிய இடம் இதுவாகும்.கிழக்குக்கடற்கரை சாலையிலிருந்து கொஞ்சம் விலகி ரெட்டிகுப்பம் வீதியில் கானாத்தூர் கிராமப்பகுதியில் இந்தக் கோயில் கட்டப்பட்டுள்ளது. இந்த கோயிலில் ஜகந்நாதர், சுபத்ரா தேவி மற்றும் பலராமர் ஆகியோரின் சிலைகளை தரிசிக்கலாம். யோக நரசிம்மர், விநாயகர், விமலாதேவி மற்றும் கஜலட்சுமி ஆகியோரின் தரிசன மண்டபங்களும் இக்கோயிலில் காணப்படுகின்றன.

இக்கோயில் வெண் சலவைக்கற்களாலும், கருப்புப்பளிங்குகற்களாலும் நிர்மாணிக்கப்பட்டுள்ளது.   காஞ்சிபுரத்திலிருந்து கருங்கல்லும் ராஜஸ்தானிலிருந்து வெண் சலவைக்கற்களும் இக்கோயிலுக்காக வரவழைக்கப்பட்டிருக்கின்றன என்று கோயிலுக்கு வருபவர்கள் சொன்னார்கள்.தெளிவான உண்மை எனக்குத் தெரியாது.

இங்கு ஸ்தாபிக்கப்பட்டிருக்கும் விக்கிரகங்கள் வேப்ப மரத்தின் மரத்துண்டுகளை கடைந்து உருவாக்கப்பட்டிருப்பதாகவும் சொன்னார்கள்.பிரம்மாண்டமான பரப்பளவில் அழகாக பராமரிக்கப்படும் பசுமையான செடிகளையும் பலவண்ண மலர்களையும் கொண்டுள்ள நந்தவனத்தின் நடுவே இக்கோயில் வளாகம் அமைந்துள்ளது.நகர சந்தடியிலிருந்து விலகி அமைதியையும் ஆன்மீக சூழலையும் வழங்கும் அற்புத ஆன்மீகத் தலமாக இந்த ஜகன்னாத் கோயில் அமைந்துள்ளது.

கபாலீசுவரர் கோயில்

சென்னையின் மைலாப்பூர் பிரதேசத்தில் இந்த கபாலீசுவரர் கோயில் அமைந்துள்ளது.இந்த கோயில் சிவபெருமான் மற்றும் அவரது துணைவியார் பார்வதி தேவிக்காக அர்ப்பணிக்கப்பட்டுள்ளதாக கோயில் சிவாச்சாரியார் ஒருவர் கூறினார். வேண்டுவதை அருளும் ‘கற்பகாம்பாள்’ ஆக இங்கு பார்வதி தேவியார் வணங்கப்படுகிறார்.

ஆன்மீக முக்கியத்துவம் வாய்ந்த இந்த தொன்மையான கோயிலின் ஆதி அமைப்பானது 7ம் நூற்றாண்டில் கடற்கரையை ஒட்டி பல்லவ மன்னர்களால் கட்டப்பட்டிருக்கலாம் என்று சொல்கிறார்கள்.

சாந்தோம் சர்ச் உள்ள இடத்தில் வீற்றிருந்த கபாலீசுவரர் கோயிலின் ஆதி அமைப்பு போர்த்துகீசியர்களால் சிதைக்கப்பட்ட பிறகு தற்போது காணப்படும் கோயில் விஜயநகர மன்னர்களால் 16ம் நூற்றாண்டில் கட்டப்பட்டிருக்கலாம் என்று சிவாச்சாரியார் மேலும் கூறினார். இக்கோயிலின் கட்டுமானம் திராவிட பாணி கோயிற்கலை அம்சங்களையே தாங்கி நிற்பது குறிப்பிடத்தக்கது.

நான் பார்த்த சென்னை (காட்சி 10) அடுத்த திங்கள் கிழமை வெளியாகும்.